La Luna (Luciano Ravasio)


Varda qe Luna bionda a l’è fiorida in ciel,
l’è piena l’è rotonda dolça come la mel,
stanoit la fa la rœda per regalar emozion,
stanoit la fa la lœsa ma i ge fa miga atenzion.

Luna qe la te incanta, la toca i cœr mulxin,
insé i poeta i canta de l’om, del so destin,
i ge fa i serenade, pœ i can qe i bor ai gats
insema ai grii ind i prads e ai done inemorade.

Luna qe la camina per tegner impiz ol mond,
quando l’è beriqina dei volte la se scond,
ai monts la ge fa i care la fa sberluxer ol Bremb
e se ved ol firmament tremar su i aque ciare.

Luna la vagabonda amixa dei pastor,
là su in de noit profonda l’è intoren come lor,
la met in fila i stelle per disegnar ricam
forse per regordar-m coss è-le i robe belle.

Luna come la mama la scolta sospirar
la jent qe spera e brama un poo de serenitaa,
la sdœgia i tenereze, i nosts moments sincer,
la spea baxin e careze mœta ind i so penser.

Luna e stelle i me segnala i senter del paradis,
col sentiment, i dix, a se pœl trovar la scala.

La Luna pelegrina tra grate de lumin
l’è prope la rejina de un mond senza confin,
de quante canzonete i loda ol so ciaror
qe al fa bruxar d’amor ol cœr dei belle s-ciete.

Stanoit la Luna bionda l’è in fior per mé e per té
perqè la vagabonda la sa qe te vœle ben,
stanoit la Luna bionda l’è in fior per mé e per té
l’eterna vagabonda la sa qe te vœle ben.