Epur mi dixi
(Walter Valdi)
 
Epur mi dixi
qe la Madonina
a la matina
senza far-s veder
la spara un colp in aria
e la da el via.
E num … tacom a correr
compagn de quei
q’inn ‘dree a stabilir un record
o a far una corsa.
Fem istess precis.
tacom a correr
a ‘ndar de qì de là:
g’hem tante robe de far !
g’hem de ‘ndar in banca
per quatar una trata,
in via Manin se no me tiren biot.
G’hem de ‘ndar ind el dotor,
ind el avocat,
a portar i liber jo ind el raxonat.
G’hem de veder qell tal
qe al g’ha un’idea
qe in fond l’è minga mal:
l’è de studiar.
 
Corrom in dita
perqè g’hem de timbrar,
o in ofizi, in negozi.
G’hem tuts la nostra corsa.
Corrom a pee, in maqina,
in lambreta
e intant qe corrom
ge la metom tuta.
Corrom indepernum,
insema a i alter
e intant qe corrom num,
corren i alter.
Restom indree, se ciapom,
se distacom, se sorpassom,
se incazom…
Se fermom mai.
Se fermom a mezdì,
ai set ore de sera,
Però l’è no un fermar-s
L’è… un’arimorta
Dopo taccom a correr
un’altra volta.
Corrom perqè se no pœ sarren su
perqè inn jamò ‘dree
a far el “fuoriprogramma”.
Ge toca correr
perqè g’hem el pontell
e prima g’hem de ‘ndar
– porca sidella –
a pagar el Pont-e-mez
a qell pistola
qe al tegn a l’Inter.
Num g’hem scometud
e hem tegnud el pari, e el Milan:
hem perdud.
Corrom e par qe g’hem de fermar-s plu.
Cosa corrom de far ?
Num sem faits insì,
l’è insì Milan,
qe prima anc’mò de vesser una citaa
l’è una manera de viver.
De viver de corsa,
de far quaranta robe in una volta,
num sem minga contents
se fem no insì.
Qi le sa minga,
qi al ne cognoss no
al dix: ma inn mats ?
Cosa corren de far ?
Ma indova vann ?
Perqé stann minga quiets ?
Le sa el Signor !
No el Signor le sa no
…la Madonina
qe a la matina
senza far-s veder,
la spara un colp in aria
e la da el via.
E num ‘se g’hem de far ?
Sentom sparar …
e alè tacom a ‘ndar.