un sit per imparar un poo de lengua lombarda
NEDAL DE ‘NA VOLTA IN CASSINA (Annibale Carniti)
Filastroca dei Nedai
qe ricorde de bagai,
co ’l paton e i sacolots,
cont le piage in sui jenocc
ind el jogar a cavallina,
qe se favem in cassina
e cont le candele a’l nas
qe netavem in sul braç
‘ndavem semper dopo cena
nolter amix a la novena.
Strade brœte de ‘na volta,
g’era giaç, spaciug e molta,
ind la borda, nev o brina,
fosqe, fosqe infin matina.
Ind la stalla a la vijilia,
comè tœta ‘na familia
g’era tœta Regassole:
none, mame, om e fiole
qe i vardava l’altarin
cont in braç i fradellin
tacad sora la travis
indov g’era el cavall grix
e ‘na pegna de sternam
per le vaqe e el manzolam.
A mezanoit, o press a poc,
desmetiva tœts i jog
per pregar el bambin bell,
in mez a’l bo e l’asinell,
i pastor e ‘na quai dona,
Sant Jusep e la Madona,
stampads su ‘na cartolina,
in mez a fior de carta velina
colorada e una quai pez
e cont tants ciar impez.
Cor in festa, allegria,
tœts i jog i riprendiva,
pepa tencia o a scova,
el jir de l’oca o a “quants in coa ?”.
qe cantava le nine nane
Strac andavem de le mame,
ai popin indorments in braç,
cont le ciucie contra el nas.
Treversad la portegada
‘ndaven tœts ind la gnada.
Filastroca dei Nedai
qe ricorde de bagai,
cont tant afet, amor, calor,
favem nasser el Redentor.